OLARIAGA, XABIER A. (Noia, 20/12/1942)

O seus apelidos son Álvarez Olariaga, pero asina co segundo deles. Catedrático de Teoría da Política Económica na Universidade de Compostela, en 1998 publicou un volume no que reúne poemas e pensamentos e que leva por título O Berro. Poemas e pensamentos de vida, amor e morte, prologado por Gregorio Azkona, e que está ilustrado por Antonieta Castro, Ana Cambeiro, Segundo Oviedo, Alfonso Costa, Luís Alberto Espinosa e Genoveva V. Estalote.
Seleccionamos o seu poema “Patria”

Ula a Pátria?
Deusa escrava, ambígua Meiga,
Lar difuso, Sima verde,
Praia núbil, Mar sem beiras:
a Nossa é-nos alheia,
a outra nem de seu é;
ulos os seios maternos?
ula a minha bandeira?
onde acougar, companheiro?
Ouh! Se eu poidera acreditar
que Pátria, Amor e Vida
som versos da mesma Epopeia ...
daquela ... ali, na moradia dos Eoas,
no imenso azul da Fisterra,
ficaria para sempre
en cinco traços vermelhos,
esmiuçado e incompleto,
alouminhado pela Morte,
o Meu Derradeiro Poema ...

Na revista de Noia <Alameda> publicou o poema “Vida. Poema telúrico” (nº 7, 2002), en homenaxe a Avilés de Taramancos.
Fóra do ámbito literario publicou o ensaio Génesis y desarrollo de la economía de la educación. Un ensayo metodológico, publicado en Santiago en 1988.