Dicionario de autores/as do Barbanza

 
 
 
   

RODRÍGUEZ DEL CASAL, JOSÉ (Boiro, ? – Madrid, 26/10/1821)

Reitor da parroquia de Santiago de Lampón, en Escarabote, publicou en Santiago en 1811 o folleto Sermón que para alentar el patriotismo e imprimir valor a nuestras tropas y alarmas dijo en la Iglesia Parroquial de Santiago, de la villa de la Puebla del Dean, D. José Rodríguez del Casal, con motivo de la bendición de la bandera de la alarma de aquel partido. A obra foi impresa por Manuel Antonio Rey en Santiago.

En 1820 foi elixido Deputado Suplente para Madrid, indicio de que era liberal, pois segundo Barreiro Fernández, nestas eleccións só saíron elixidos deputados dese signo. Nese ano morreu o deputado titular Ruíz Prado e Rodríguez del Casal foi chamado para substituílo. Tomou posesión o 2 de marzo de 1821 e na sesión do 13 de outubro dese ano defendeu no Congreso un novo modelo de división provincial para Galicia, que constaría de cinco provincias: A Coruña, Santiago, Tui, Lugo e Ourense. Morreu aos poucos días desta proposta.