O auditorio de Ribeira foi o escenario no que tivo lugar, o pasado sábado 29 de novembro, o acto de presentación do IV Anuario de Estudos do Barbanza, que edita a Asociación Cultural Barbantia. O libro recolle traballos dunha gran variedade de eidos temáticos, dende o cine ata etnografía, pasando pola tradución ao galego de autores inéditos na nosa lingua. Na mesa, presidida polo alcalde de Ribeira, José Luis Torres Colomer, estaban tamén presentes Luciano Fernández, concelleiro de cultura; Pastor Rodríguez, coordinador do Anuario; Milagros Torrado, directiva de Barbantia; e Alberto Piñeiro, coordinador da asociación.
Anuario de Estudos do Barbanza 2008
Ese mesmo mediodía, sen mudar de escenario, os socios de Barbantia asistimos á entrega dos “sirenos” de bronce, cos que nesta ocasión se premiou a Manuel Dourado, Premio Barbantia á Traxectoria Cultural no Barbanza; o Museo Etnográfico de Artes, Premio Barbantia á Iniciativa Cultural no Barbanza; e Alfonso Costa, Premio Barbantia da Cultura Galega 2008.
