O vindeiro venres 31 de marzo, ás 20:30, no auditorio de Ribeira, coincidindo coa saída do número 13 de A Voz de Barbantia, teremos un acto sobre a Promoción Social do Uso do galego, nun acto que Barbantia organiza xunto coa Asociación Altofalante en colaboración con La Voz de Galicia e A Mesa pola Normalización Lingüística.

Nesta mesa estarán Ánxela Bugallo, Conselleira de Cultura e Deporte, Carlos Callón, presidente da Mesa pola Normalización Lingüística, Caetano Díaz, director do xornal Galicia Hoxe, Francisco Fernández Rei, lingüísta e membro da Real Academia Galega, Ramón Ares, Delegado de La Voz de Galicia, Luís Teira, presidente de Altofalante e mais Xosé Ricardo Losada, escritor e secretario de Barbantia. Moderará Nel Vidal, socio de Altofalante e Barbantia.

O vindeiro venres 24 de Marzo ás 20:30 horas, no Coliseo Noela de Noia, presentación das obras Crónica dunha democracia e A revolta nacionalista, das que é autor Xerardo Agrafoxo, socio de Barbantia. No acto estará acompañado polos escritores Xosé Agrelo, Pedro García Vidal e Pastor Rodríguez.